五大必食特色 泰國美食 2021

響泰國呢個美食國度,要搵好野食根本唔難。

但係作為一個四日三夜嘅旅遊者黎講,如果你對 泰國美食 唔太認識,好可能就同一大堆美食刷身而過,只點冬蔭功、泰式生蝦,及後發現原來泰國美食如此廣博,便成為人生一大憾事。所以今次我會介紹一下,五款令我一直念念不忘,一番到泰國就必定要食嘅泰國美食,希望大家再到泰國時,可以擴闊大家嘅味覺體驗。

先從最簡單開始:

1. 青木瓜沙律 (Somtum ส้มตำ) - 國民級泰國美食

翟道翟 青木瓜沙律
咸蛋沙律 ตำไข่เค็ม

「唔係麻? 咁都叫特色,唔洗你介紹啦!」請先聽我講,青木瓜沙律當然好多人食過,但其實青木瓜沙律可以引伸好多唔同版本,例如粟米、水果、藕帶、生蟹、三文魚、螄蚶… 等等,為大家介紹幾款我嘅最愛:

螄蚶青木瓜沙律 (Cockles Salad ตำหอยแครง)

iconsiam 螄蚶青木瓜沙律

呢個可能有所爭議,唔係人人接受到,但佢的確係我嘅至愛! 好食嘅螄蚶應該半生熟、仲有少少紅色,呢個狀態最爽口甜美! 再配上青木瓜沙律同埋其他配料,將螄蚶嘅鮮甜味道帶出,真係講起都流哂口水! 雖然地道餐廳最好味,如果你怕唔衛生會肚屙, ICONSIAMPhuthai Kaiyang 1971 或者 Bann Somtum 係非常唔錯嘅選擇,環境衛生整潔。

粟米沙律 Corn Salad (Dom kao pod ตำข้าวโพด)

平易近人嘅選擇,粟米香甜,再加上酸酸甜甜辣辣嘅 dressing,好味!

iconsiam 栗米沙律

藕帶沙律 Lotus Salad (Dom sai bua ตำสายบัว)

藕帶的確少見,其實係BB版嘅蓮藕 – 爽脆,微帶酸味非常開胃。要試呢類地道版沙律,翟道翟(JJ Market) 有一間 จัดจ้าน (音: Jad Jan 澤爭) [地圖],響 Section 4 Soi 2 附近,唔知點解香港無乜人介紹佢,但其實泰國本地人經常光顧,甚至唔係為左購物只係去光顧佢!

2. 泰北金麵/咖哩麵 Thai curry noodle (Khao Soi ข้าวซอย) - 泰國北部風味

圖片來源: scmp.com

大家千祈唔好俾「咖哩」二字界定左佢同「印度咖哩」同一種風味。金麵既有姜黄辛香料嘅特色,亦有椰奶嘅香、棕榈糖嘅甜,一般仲會附上蔥頭、腌辣酸菜同青檸等配料,配上脆麵同麵條嘅獨特美食。Khao Soi 係到訪清邁附近必試美食,而響 曼谷 Ari 架空鐵路附近有一間 Ongtong Khaosoi 走文青風嘅泰北餐廳,鋪面小小的,經常要取籌排隊。

Khaosoi 泰北金麵 乾咖哩麵
Ongtong Khaosoi 嘅乾 Khaosoi

3. 泰式燒烤火鍋 Thai barbecue and hotpot (Moo-kata หมูกระทะ)-一爐兩食

mookata 泰式燒烤火鍋

另一個每次到泰國都必食嘅菜式。其實Mookata既係燒烤,又係火鍋。中間嘅位置會先塗上一層豬油,然後將肉片放上去煎,而側邊坑位會加入湯底,用黎煮蔬菜、粉絲、小肉丸等食材,一個爐滿足哂兩種慾望。記得第一次去泰國旅遊,見到有本地人響路邊圍埋食,即刻心思思想試,但當時就唔知響邊度有。Mookata 係一種非常地道嘅美食,但作為一個遊客第一次想舒舒服服品嚐,建議去 Bar.B.Q Plaza 最簡單直接又衛生。個人覺得最推介嘅,其實係佢地嘅醬料,特製燒烤醬 + 辣椒 + 青檸汁,配肥膩嘅肉片一流。佢地提供任加椰菜,可以食菜食飽。順帶一提,佢地之前推出嘅 咸蛋雪榚超.級.好.食!

Bar.B.Q Plaza
早前因應社交距離措施而坐到全場恐龍仔嘅,就係Bar.B.Q Plaza

4. 泰式米線 Fresh rice noodles (Khanom-Chin ขนมจีน)-配搭百變

Khanom-Chin 泰式米線

Khanom-Chin係一個大種類,名稱直譯係「中式點心」,但我個人覺得非常泰式。佢可以配搭唔同湯底、配料做成唔同菜色。其中一種比較特別嘅係佢會做成一個個小麵團,側邊放上唔同嘅配料 – 例如芽菜、青瓜、醃菜、辣椒等等,因應你喜好,可以配埋唔同嘅咖哩混合埋一齊食。我最鍾意嘅就係 Khanom-Chin 配咖哩蟹肉 ! 雖然Khanom-Chin賣相普通,但係食過真係會愛上,所以被列入五大名單之中。

另一款放湯嘅 Khanom-Chin nan neaw ขนมจีนน้ำเงี้ยว 另一類美味!

Ongtong Khaosoi 試到另一種別有風味嘅 Khanom-Chin nan neaw ขนมจีนน้ำเงี้ยว,配上豬紅、排骨,特別惹味!

 

5. 咖哩蒸魚泥 Steamed Curried Fish (Haw Moak ห่อหมก)

基乎搵唔到任何中文譯名,咖哩蒸魚泥似乎係最貼切嘅名。介紹嘅人唔多,但絕對值得一試。混合各種泰式香料,如南薑、香茅、檸檬葉、蝦醬、花生和椰奶,再加入魚蓉蒸煮,有時仲會加入其他海鮮增加口感,椰奶增加左菜式嘅香滑度,口味咸甜濃郁,就好似將所有海鮮嘅鮮甜咸香濃入一口 Haw Moak 入面。有著唔同形態,有用蒸葉包裹,有用原個椰青上,鍾意香濃口感必試!

咖哩蒸魚泥 Haw Moak ห่อหมก
整個椰青上 !

 

同場加映  甜品 珍多冰 (Lod Chong ลอดช่อง)

雖然香港都有珍多冰,但泰國嘅珍多冰絕對令人喜出望外!椰奶嘅香味同椰糖嘅焦香絕對帶你重新認識珍多冰。

後記

寫呢篇文章嘅時侯真係好痛苦,而家仍然係疫情期間,包括泰國在內各地仍然處於封關狀態。
望住各種美食但係無得食,痛苦萬分。但同時間亦都因為呢篇文章,翻睇番好多舊相搵材料,真係充滿回憶。
希望各地疫情可以盡快好轉,大家可以再次去到泰國享受各種特色美食。
如果大家有其他泰國嘅資訊想我地交流,非常歡迎透過各種渠道聯絡我地。

分享

您可能也會喜歡

發表留言

你的電郵並不會被顯示。