清邁三天兩夜 回憶錄

2020年前,如果我同你講你一年都唔可以去一次旅行,你大概會覺得我痴線;2020年,你真係去唔到一次旅行,你都差啲痴線。近日整理舊照,無意中睇返一個folder “Chiang Mai 3d2n”,嗰時旅行去得密,有時間享受,冇時間感受,睇返舊照當重新去咗一次清邁。

時間:2018年10月

天氣:下午太陽比較猛,記得搽足防曬;入夜後涼得快,帶件外套就啱晒

清邁其中一樣最出名係cafe,今次會介紹3間當時去過嘅cafe,同場加影一間高質fine dining。

Cafe 一:「拉花冠軍咖啡店」- Ristr8to

清邁 拉花冠軍咖啡店- Ristr8to

晌google map 度search 你就知點解呢間cafe 出名,因為google 上竟然叫「拉花冠軍咖啡店」!Ristr8to 的名字明顯取材自ristretto,而ristretto就係更加濃嘅espresso。開在路邊並唔係好起眼嘅一間咖啡店,大有「禾桿冚珍珠」之味道。店內係工業風,空間唔算大,除咗裝潢有啲心思,佢哋最特別係用唔同嘅杯去serve 唔同嘅咖啡,更顯佢哋嘅風格。有一個杯有立體骷髏頭嘅圖案,有一杯則係用4枝試管作容器(我都唔sure杯係咪正確量詞了)。當時我哋就試咗個試管咖啡(小編已忘記佢叫咩名),一杯latte (latte art 冠軍嘛)同食咗個cake。其實都唔使多講,cake 好食,咖啡好飲,拉花靚。唯獨是坐唔得耐,因為太出名,太多人慕名而去,唔想阻住人做生意就走了。

Cafe 二:城市中的花園 – Woo Cafe Art Gallery

一走入呢個cafe,你唔會覺得佢係cafe,而係花墟。入面要經過幾重花海先會見到cafe。其實呢個佈局幾好,穿過大量植物後心懭神怡,用餐心情都提升不少。Cafe空間寬敞,我哋2人坐咗六人枱咁滯(可能唔係 peak hour) ,食物方面都係色、香、味俱全。當時叫咗個應該係冬蔭功炒飯,一個肉腸小食,同兩杯泰式凍奶茶。其中一間最relax 的cafe in Chiang Mai. 小編準備資料時發現佢顯示為”暫時停業”,立即嚇一跳,以為佢敵唔過疫情要關門大吉,原來會在2021年2月8日會重開。

 

Cafe 三:萬綠叢中一點「啡」- No. 39 cafe

離開市區頗遠(清邁其實唔大),Grab車程大約15分鐘,到達一片叢林。找到入口後「柳暗花明又一村」,放眼見到中間一個水池,池嘅對面有一間木屋,唔知係咩人住。忽然發現身邊嘅就係一間cafe,完全冇突兀嘅感覺,靚悄悄咁融入池畔環境。cafe 設計似一間溫室,可得到大量然光,然而坐位不多,你就明白間cafe 去嗰度開,並唔係要成為焦點,而係點綴園林景色,並提供消暑享受。因為泰式奶茶飲得太多(睇啲相越來越脹)所以今次點咗杯ice americano,然後坐在外面飲用。溫馨提示:有山有水,自然有蚊。「記得帶定蚊怕水,咪俾蚊針對美腿」。

同場加影:簡單而華麗的 fine dining – David’s Kitchen

小介紹:David 係倫敦人,十幾年前去清邁,開始時其實教英文,認識咗Prom,現時之太太。後期決定一齊開一間餐廳,每晚都full booking,跟住就搬咗去現時嘅地方。佢哋希望呢間餐廳唔係嗰種你驚自己唔識叫嘢食嘅fine dine,而係好似你去朋友屋企食飯咁嘅型式。即係「佢高傲,但係宅心仁厚。 佢低調,但係受萬人景仰。」啲friend。記得當晚食食吓嘅時候佢係出咗嚟同我哋打招呼。後尾佢有send 個email 話唔好意思,佢牙痛要睇牙所以冇辦法親自greet 我哋。懷疑佢係記錯日子,但你可以見到佢當每一位用餐嘅係朋友多過客人,的確係幾窩心嘅。不過因為疫情而家就暫時關閉。

雖然講咗好多次,希望疫情快啲過去,有得去返旅行。或者你都整理下舊相,當嚟一個time travel,可能會發現新嘅感受。

分享

您可能也會喜歡